雖然，退休要花多少錢真係豐儉由人，但有時唔係你話想使少就得，尤其係年紀大機器壞，醫療開支要有準備，亦不要奢望政府可以幫到好多。有病，排唔排到等睇公立醫院愈來愈成疑。排唔到，諗住睇私家？醫療通脹其實近雙位數，除非好有預算，否則數10年後又真的仍睇得起？

就算不理通脹，單以現時物價去計，一個好少少的細劏房都每月租金都起碼要近5,000元，當大家只有85歲命，房東又好好永不加租，65歲退休，租20年，都已花了120萬元。剩下每月只有唔夠3,400元，加埋生果金可能會多千幾二千元（將來會變幾錢唔知，相信唔會大幅增多），都只得數千元用，還未計水、電、煤等雜費，生活質素恐怕非大家預期。

假如你好努力，有私樓如何？數千元管理費及差餉唔少得，還有可能要夾錢大廈維修(順帶一提，如想搵到安樂窩退休，買之前，要睇清楚屋苑法團及管理公司是否正路，起碼都上網查一查)。住方面的基本開支着實不輕。